ලෝකයේ ඉහළම ගුණාත්මකභාවයෙන් යුත් දේශීය මිනිරන් භාවිත කර නවීන බැටරි වර්ග නිෂ්පාදනය කරන රජයේ සමාගමක් ඇතිකිරීමට කඩිනමින් අවශ්ය පියවර ගන්නා ලෙස ආර්ථික පුනර්ජීවනය හා දරිද්රතාව තුරන් කිරීම සඳහා වන ජනා
ධිපති කාර්යසාධන බළකායේ සභාපති බැසිල් රාජපක්ෂ මහතා පවසයි.
අරලියගහ මන්දිරයේ පසුගියදා (9) පැවති සාකච්ඡාවකදී ඒ මහතා මේ බව සඳහන් කළේය.
නිපුණතා සංවර්ධන, වෘත්තිය අධ්යාපන, පර්යේෂණ හා නව නිපැයුම් රාජ්ය අමාත්යංශයේ මූලිකත්වයෙන් සිදු කළ පර්යේෂණවල ප්රතිඵලයක් ලෙස ජාතික මූලික අධ්යයන ආයතනය නවීන බැටරි වැනි නිෂ්පාදන සඳහා දේශිය මිනිරන් භාවිතා කිරීමේ හැකියාව අනාවරණය කරගෙන ඇත. දේශිය මිනිරන් (ග්රැෆයිට්) සඳහා අගය එකතු කිරීමෙන් ඉහළ පාරිශුද්ධතාවකින් සහ ඉහළ විදුලි ධාරිතාවක් ගබඩා කර තබා ගැනීමේ හැකියාව ඇති 'ග්රැෆීන්' නිෂ්පාදනය දැනටමත් SINTEC ආයතනය විසින් සිදුකරනු ලබයි.
ලෝකයේ වෙනත් රටවල නිෂ්පාදනය කරන ලිතියම් අයන් බැටරිවලට (Lithium-ion Battery) වඩා ඉහළ විදුලි ධාරිතාවක් සහිත බැටරි නිෂ්පාදනයෙන් ලෝක වෙළෙඳපොළේ වැඩි ආකර්ශනයක් ලබාගැනීමේ හැකියාව ඇත. මේ සඳහා වූ වෙනම රාජ්ය සමාගමක් පිහිටුවීමට මේ සාකච්ඡාවේදී තීරණය කළ අතර, සමාගම පිහිටුවීමට අවශ්ය ප්රාග්ධනය රාජ්ය ආයතන හා රජයේ අරමුදල්වලින් ආයෝජනය කිරීමට යෝජනා විය. මෙසේ බිහි කරන සමාගම් ලාභ ලබන තත්ත්වයට පත්කර ඉතා ඉහළ මිලකට අවශ්ය නම් දේශීය ආයෝජකයන්ට පවරා දී එමගින් ඉහළ ආදායමක් රජයට ලබාගැනීමට ඇති හැකියාව පිළිබඳවත්, මෙහිදී සාකච්ඡා විය.
තවද, ලෝකයේ බැටරි නිෂ්පාදනය කරන කීර්තිනාමය දිනාගෙන ඇති සමාගමකට කොටස් අලෙවි කර ඔවුන්ගේ වෙළෙඳනාමය භාවිතා කර ලෝකයේ බැටරි වෙළෙඳපොළ ආකර්ශනය කරගැනීමේ හැකියාව පිළිබඳව ද අවධානය යොමු විය.
නව උත්පාදන හඳුන්වා දෙමින් නිෂ්පාදන අවශ්යතාව සැලසුම් කිරීමේ දී මුලික අධ්යයන ආයතනය, ශ්රී ලංකා නැනෝ තාක්ෂණ ආයතනය, විශ්ව විද්යාල, භූ විද්යා සමීක්ෂණ හා පතල් කාර්යාංශය යනාදී ආයතනයන්හි පවතින තාක්ෂණය හා මානව හා භෞතික සම්පත් යොදා ගනිමින් ඒකබද්ධව ක්රියා කරන ලෙසද බැසිල් රාජපක්ෂ මහතා මෙහිදී වැඩිදුරටත් සඳහන් කළේය.
රාජ්ය අමාත්යවරුන් වන විශේෂඥ වෛද්ය සීතා අරඹේපොළ මහත්මිය ද, තාරක බාලසූරිය මහතා ද, රාජ්ය සහ පෞද්ගලික අංශයේ නිලධාරීහු රැසක් ද මේ අවස්ථාවට සහභාගි වූහ.
No comments:
Post a Comment